مشاركته في شاعر المليون [ المرحلة الاولى ]
بعض من نصوصه الشعريه :
( نــور )
نبدا هنا.. نحكي حكاية بنت في عمر الزهور
حلوه , رقيقه .. تحترق بالدمع لو تسمع هواش
تغيب .. يوقف عقرب الساعه , واذا طلّت يدور
يعني إنتظارك فالنهايه غير قابل للنقاش
في أي حفل تكون به هالبنت .. شف شكل الحضور
تصبح ملامحهم .. ترقب , خوف , رهبه , إندهاش
تضحك لذيك .. وتبتدي هذي من (الغيره) تثور
متواضعه .. تنسى إنها الأولى .. يذكّرها الفلاش
أنفاسها لاسولفت .. أحلى دعايه للعطور
فعيونها قصة رجل من جا على الدنيا وعاش
لاجت تنام .. أحلامها فوق السرير تصف دور
وتصيح فيهم : يايجيني حلم مثلي .. يابلاش
نامت وحلمْت بـانها ورده .. يميّلها الغرور
وكل مايميّلها الغرور تزيد نشوه , وإنتعاش
وجات أمها تهزها : قومي ياماما ( نور .. نور )
وبدت تفكّ عيونها بشويش .. ويطير الفراش
لا تعاتبني ..!
وقت العتـب راح لاترجـع تعاتبنـي
مات الوفا والبقـا فـي راس وجدانـي
ماني مثل ما انت خابرنـي وتحسبنـي
محمـد الاول اصبـح واحـدا ثـانـي
خلاص مات الهـوى لاتهـدم وتبنـي
تركتنـي ليـن جـا النسيـان نادانـي
العـام ادوّر سبـب منـك يقربـنـي
واليوم ادور سبـب عشـان تنسانـي..
بعثرتني فـي هـواك اليـوم رتبنـي
نسيتني الناس شفني صرت وحدانـي..
كان السهر في هـواك اللـي محببنـي
والحين حتى السهر يكبر على اجفانـي
اجيـك يمحينـي عتابـي ويكتبـنـي
مافيه طاري عتـب يمـر ماجانـي..
وارجع وانا اقول: وش للجرح جايبنـي
ادري بجرحك ولا ادري ويش وداني!!
عن صدق الاحلام جا الواقـع وكذبنـي
وعن فرح الايام جـا حبـك وبكانـي
مليت اشيـل الامـل والدمـع يغلبنـي
واقول بكـره يجـي للشـوق يلقانـي
ويروح بكره واجـي والوقـت قالبنـي
وارجع على وحدتي واحزاني .. احزاني
بكيتـك العـمـر كـلـه يامعذبـنـي
وشفيك ماتبكـي الليلـه علـى شانـي
كتبت ماهـو عشـان تقـول عاجبنـي
مليت مـن جزلـه وصـح الله لسانـي
انا وطن شعر لـو شعـري مغربنـي
كتبت اجمل جروحـي لجـل تقرانـي
خـلاص لاتتعـب وترجـع تعاتبنـي
انا نسيتك دخيـل جروحـك انسانـي
كفيتي ووفيتي ..}
خلي البكا عنك , جـف الدمـع بأهدابـك
ماعـاد ينفـع رجـاك ولـو ترجيـتـي
قبـل تشوفيـن دمعـك ويـش سـوابـك
شوفـي وش اللـي مـع الايـام سويتـي
رحتي لوقتـك , وخانـك وقتـك وجابـك
لاتقولـي إنـك عشـان الحـب رديـتـي
عـوّدت قلبـي علـى فرقـاك وغيـابـك
كـل ماسألنـي اقـول إنــك توفيـتـي
اللـي قبـل كـان يكتـب بـك ويقرابـك
فـي عـز ماكـان محتاجـك تخليـتـي
هواك كذبة عمـر عاشـوا بهـا احبابـك
كذابـه ان قلتـي انـك يــوم حبيـتـي
كل الـدروب / الـوداع ان مـرت فبابـك
وكـل الامانـي / ضيـاع اليـا تمنيتـي
وجهك ذبل , جف غصنك , طارت اسرابك
مثـل الشقـا يـوم مـر القلـب مريتـي
لو صدق كانت دموعي تحـرق أعصابـك
ماكان خنتـي وفـا قلبـي .. وتضحيتـي
زرعـت حلـم الزمـان ومـات فترابـك
واغراك صمتـي عـن البعـد وتماديتـي
يكفيني اللـي خسـرت وضـاع بأسبابـك
شكراً علـى الحـزن .. كفيتـي ووفيتـي
انا انتهت بـك سنينـي , مقـدر ابدابـك
ودعـت الأوجـاع مـن رديـت عافيتـي
وانتي تركتك على آخـر سطـر بكتابـك
ذكـرى رحلتـي عـن البـال وتلاشيتـي
لـو سامحتـك السنيـن ودمعـة عتابـك
ماسامحـك حلمـي اللـي فيـه ضحيتـي
ولـو كنتـي العمـر ماعاشـك وغنابـك
قـلـبٍ تركتـيـه للفـرقـا وصديـتـي
ردي على الحزن انتـي حزنـك اولابـك
جيتي حزينه .. وروحـي مثـل ماجيتـي
كان ياما كان ..!
كان ياما كـان ( قبـل ) بسالـف العصـر واوانـه
قبل يمكن اربـع وعشريـن عـام او شـي دونـه
كان فيه انسـان قـد الحلـم واكبـر مـن زمانـه
اولـه مثـل آخـره .. وآخـرّه كـان الله بعـونـه
ابتـدى طفـلٍ يشخبـط عمـره ويـرسـم كيـانـه
تشرق الدنيـا مـن احلامـه وتغـرب فـي عيونـه
غيـر ضحكـه ماشغـل قلبـه ولا حـرّك لسـانـه
وغير شنطـة مدرسـه واحـلام ماشالـت متونـه
المهـم : الطفـل هـذا كانـت احـلامـه جبـانـه
يبنـي احلامـه لباكـر وان صحـى باكـر تخونـه
ابتـدا يكبـر , وتصغـر فرحتـه .. ويقـلّ شـانـه
وتسقط اوراقه , ويوسـع همـه , ويضيـق كونـه
الطفل هذا عطـى الماضـي لرجـل وقـال : امانـه
لايغيّـر حـاضـرك بــراءة المـاضـي ولـونـه
قـد ماتقـدر تسـوي ســو بالدنـيـا عشـانـه
ضحّ بأغلـى شـي عنـدك لجـل ماتبغـى تكونـه
روّح الطفـل وبقـى الرجـال واقـف فـي مكانـه
لاتزال ترنّ فـاذنه : ( عمـري اصحـى لاتخونـه )
امتطـى الرجـال صهـوة عمـره وأمسـك عنانـه
واستمـر يـربـي الحـلـم ويـداريـه ويصـونـه
يطلع الصبـح , ويـرد الليـل .. مـا للحـظ خانـه
كـل يـوم يـدوّر المستقبـل .. ويرجـع بـدونـه
صار يعـرف مايبـي يجهلـه مـن بـاب الميانـه
ويجهل اللي يعرفه , لجـل ان جهـل بـه يعرفونـه
مستعـد انـه يخسـر اشيـا ولايخـسـر رهـانـه
عـرّض افكـاره لمـوت الوعـي حتـى يفهمونـه
لين مرّه .. شـال فكـرة عقلـه , وطـاوع جنانـه
وابتـدا يعبـث بعمـر الطفـل , وانقـاد لشجـونـه
حب , واحساس , وحزن , واشواق , ووداع , وخيانه
نـاس يستقبلهـم بقلـبـه , ونــاس يودعـونـه
ينتهـي جرحـه مـع فلانـه , ويبـدأ مـع فلانـه
بـدّل الضحكـه بدمـع , وبـدّل الـعـز بمهـونـه
ليـن ضـاع وضيّـع الحلـم وفقـد لمسـة حنانـه
وانخذل في كل مـن حولـه , وخابـت بـه ظنونـه
وراح يسأل : كيـف ارد العمـر واوفـي بالأمانـه؟
جاوبه صوت الزمـان اللـي تجـرد مـن سكونـه
الرجـل : يقـدر يلطـخ ماضـي الطفـل بخيـانـه
بس كيف الطفل يوصل حاضـر الرجـل ويصونـه ؟!
( غربة العمر )
اليوم هذا حزن , وشعور فرقـا , وكبـت
دورت للشعـر شــي يـردنـي مالقـيـت
كثر الفرح بالشعـر زمـان لامـن كتبـت
كثر الحـزن للشعـر هلحيـن لامـن قريـت
عرفت معنى حضوري بس من يوم غبـت
ماعـاد همـي غـلاف وصـوره ومانشيـت
خسرت ياما ولاعمـري وقفـت وحسبـت
لو بحسب اللي خسرته فالحيـاه .. اغتنيـت
صدقت هذا .. على هذا شرهـت وعتبـت
زعلت .. ماشفت احد همه رضاي .. ورضيت
في عز ماكنت محتـاج لعطـا .. ماطلبـت
وفي عز ماكنت محتاج اني آخـذ .. عطيـت
ياغربة العمـر طالـت رحلتـي ماقربـت
تعبت خُطا الذاكره مـن كثـر مانـي مشيـت
خليت حزني , وذكراي القديمه .. وجبـت
حلـمٍ نسيتـه ورى ظهـر الليالـي وجيـت
جيتك بعد ماتعبت مـن الغيـاب وهربـت
في داخلي حكـي , خايـف نبتعـد ماحكيـت
الصمت طوّل .. وانا من طول صمتي تعبت
ماعدت انا المشتعل , طار الفـراش وطفيـت
واليوم بعد التعب والحزن والصبـر تبـت
وخليت لك جرحك .. وخوفي عليك وسريـت
يمكنّي أنساك لو طال الزمـن واغتربـت
ويمكـن بتبقيـن فينـي عايشـه ماحيـيـت
أحيان : صدقك صعب تخفيه لامن كذبـت
لاقلت ناسي .. وصاح الجـرح : لا مانسيـت
( الفراق الطويل )
مايفيد العتـب كثـر المشاريـه
لاتعاتـب علـى قـل الكـلافـه
عاشقك لو يعرف العمر وشفيـه
ماتشوفه جلس فـي ظـل قافـه
الفراق الطويـل اللـي بتحكيـه
شفّتـك قالتـه لـي بإرتجافـه
شيئٍ تخـاف منّـه .. لاتسويـه
سو شيـئٍ تخـاف انـك تخافـه
شاعرٍ كنت تنبـت شعـر بيديـه
شوفه اليوم يكتب عـن جفافـه
ان بغى يوصلك ماعـاد يمديـه
وان بغى ينتظرك العمـر طافـه
مختلف .. لو يشابه من حواليـه
ميـر ماضيّعـه غيـر اختلافـه
لو رحل عن عيونك .. لاتناديـه
يا يخونك .. او يخون المسافـه
رح .. وانا لو بعاف الدرب بمشيه
مجبر احيـان تعشـق ماتعافـه
ايه احبك .. وحبك ويـن اوديـه
عن حنيني وهـو لامـر شافـه
.. وابتدى حزني اللي بنتهي فيـه
وانتهينـا علـى قـل الكـلافـه
حلمي اللي قضيت العمـر اربيـه
مات قـدام عينـي .. ياحسافـه
ميلاد عيد .. !
تمضي سنين وتقبل سنيـنٍ جـداد
وانتي مثل ماكنتي احلـى, وتبقيـن
كن العمر لامن مضى فيـك ينعـاد
كل ماكبرتي .. طفله اكثر ترديـن
طيري وخلي شوق الاشجار يـزداد
وريهم انه صار عنـدك جناحيـن
وقولي لهم:من كنت في حضن ومهاد
وانا المدى يسأل: متى بس تطيرين؟
واليوم زدتي عام , والعام بـك زاد
واشعلتي الشمعه ثلاثـه وعشريـن
واصبحتي اجمل طفله بعين الاولاد
وابعد مدى للحلم ماتوسعـه عيـن
عيدك صباحات ومسافـات وبـلاد
عيدك براءة طيش , عيدك تلاويـن
عيدك شعر يدعي لهالعيـد ينعـاد
وتردد الابيـات : آميـن .. آميـن
كل عام وانتي نبض في قلب الاعياد
وكل عام وآنا احبك اكثر من الحين
02-Jun-2009, 02:55 AM
استضافة الشاعر "محمد الوسمي المطيري" في منتديات زحمه 
العرض العادي
